ان كنت تنشد يارفيقي عن الحال
مالي على كتمانها عنك حيله
الصبــر عن بوح الأحاسيس قتّال
والبوح في بعض المواقف فشيله
لو كل مايطري على البال ينقـال
ماكان شفت ان الثقيله ثقيله
ابطيت اكافح ضيقة البال بالبال
وادفع بلا ... هاجوسها كل ليله
لين اقبلت مثل السحابة بهمال
تشفي غليل اللي تزايــد غليله
طاحت ولا وفق من حناياك منزال
وابطلبك يابدر تكمى المخيله
ان قيل ترعد قلهم صوت زلزال
وان قيل تبـرق شف لها ادناة حيله
مابي تناقلها هل القيل والقــال
وتصير من بعد القصيره طويله
يابدر ماني عال لو صحتي عال
شفني من الصدمــات نفسي عليله
اشيل حمل لو يشيلـنّه جبال
الله وامانه غير تصبح نثيله
ارمي من هموم الزمن واسحــب ادبال
وانزل عن الجــوكر وغيري يشيله
من كثر ماشفت بحياتي من انذال
بديت اشك ؟ ان النذالة فضيله
ماطاح من عيني رجل طاحو رجال
ورجال يابن الناس ماهي قليله
اقرب من الي قالهم ضمن ماقال
راكان بن حثلين راعي الجزيــله
هذ ولد عم وهذا ولد خال
وهذا رفيق مالقينا بديله
سبحان منهو يابدر غيّر الحال
وحط الجفا بين الخليل وخليله
هذا الزمن يبغاله لسان دلاّل
من يستحي هالوقت واعزتي له
وقت به الراعي غدى راعي دلال
كل على طاريه ينفض شليله
ومن كان ساسه للردى مضرب امثال
اليوم يحسب من كبار القبيله
(( المال يابن الناس ملعون ابو المال
ذل العزيــز وعــــز ناس ذليلـــه))
,
,
,
م.............ن
الأربعاء مايو 28, 2008 3:23 pm